VƏTƏN MÜHARİBƏSİNDƏ HƏLAK OLANLAR: BAŞ LEYTENANT VÜSAL BABAYEV

Vüsal Sübbuh oğlu Babayev (8 yanvar 1992; Pirallahı rayonu, Bakı şəhəri — 21 oktyabr 2020; Füzuli rayonu) — Azərbaycan Silahlı Qüvvələrinin baş leytenantı.

Vüsal Babayev 1992-ci il yanvarın 8-də Bakı şəhərinin Pirallahı rayonunun Pirallahı adasında anadan olub. O, Pirallahı rayon 186 nömrəli tam orta məktəbini bitirib. Ailəli idi, iki övladı yadigar qaldı. 

Vüsal babayev orta məktəbi bitirdikdən  Heydər Əliyev adına Azərbaycan Ali Hərbi Məktəbinə daxil olub. 2014-cü ildə hərbi məktəbi leytenant rütbəsi ilə bitirib.  Həmin il Silahlı Qüvvələrin Təlim və Tədris Mərkəzinə daxil olub. 2015-ci ildə Yerüstü artilleriya taqım komandiri kursunu bitirib.

Vüsal Babayev 2015-ci ildə Goranboy rayonunda, sonuncu dəfə, 2018-ci ildə isə Abşeron rayonunun Pirəkəşkül qəsəbəsində ağır artilleriya hissəsində komandir vəzifəsində xidmət göstərib. 

Baş leytenant  2020-ci il 27 sentyabr tarixində başlanan Vətən müharibəsində vuruşub. 2020-ci il oktyabrın 21-i Füzuli rayonunun Gecəgözlü kəndində yaralı döyüş yoldaşını xilas edərkən yanına mərmi düşməsi nəticəsində həlak olub.