VƏTƏN MÜHARİBƏSİNDƏ HƏLAK OLANLAR: SAMİR ALLAHVERDİYEV

Samir Elçin oğlu Allahverdiyev (7 iyun 2001; Lənkəran şəhəri, Azərbaycan — 22 oktyabr 2020; Qubadlı rayonu, Azərbaycan) — Azərbaycan Silahlı Qüvvələrinin əsgəri.

Samir Allahverdiyev 2001-ci il iyunun 7-də Lənkəran şəhərində anadan olub. 2007-2018-ci illərdə R.Məmmədov adına 5 saylı Lənkəran şəhər tam orta məktəbində təhsil alıb. Subay idi.

Samir Allahverdiyev 2019-cu ildə müddətli həqiqi hərbi xidmətə çağırılıb.

Vətən müharibəsinə qədər Azərbaycan Silahlı Qüvvələrinin Ağcabədi rayonunda yerləşən “N” saylı hərbi hissəsində xidmət edirdi.

Azərbaycan Silahlı Qüvvələrinin əsgəri olan Samir Allahverdiyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Füzuli, Cəbrayıl və Qubadlının azadlığı uğrunda gedən döyüşlərdə iştirak edib.

Samir Allahverdiyev oktyabrın 22-də Qubadlı döyüşləri zamanı həlak olub. Lənkəran şəhərində torpağa tapşırılıb.

VƏTƏN MÜHARİBƏSİNDƏ HƏLAK OLANLAR: SAHİL MƏMMƏDOV

Məmmədov Sahil Rasim oğlu (7 iyun 1995, Qaraçuq, Naxçıvan Muxtar Respublikası – 28 sentyabr 2020, Murovdağ, Kəlbəcər rayonu).

Sahil Məmmədov 07.06.1995 Naxçıvan Muxtar Respublikası Naxçıvan şəhər Qaraçuq qəsəbəsində anadan olub. 2001-2005-ci illərdə Qaraçuq kənd orta məktəbində, 2005-2009-ci illərdə isə H.Əliyev adına tam orta məktəbdə təhsil alıb. 2009-2012-cı illərdə H.Əliyev adına Hərbi liseyə daxil olub. 2012-ci ildə Heydər Əliyev adına Azərbaycan Ali Hərbi Məktəbinə daxil olub. 2016-cı ildə həmin məktəbin «motoatıcı» ixtisası üzrə bitirib. 2016-cı il iyul 4 də Müdafiə nazirinin müvafiq əmrinə əsasən xidmətini davam etdirmək üçün  N saylı hərbi birləşmənin snayper bölüyündə bölük komandirinin müavini, 2019-cu ilin mart ayında N saylı hərbi hissədə Həmlə taborunda taqım komandiri vəzifəsində xidmət edib. Ailəli idi. Bir qız övladı qalıb.

Tovuz döyüşlərində və II Qarabağ müharibəsində iştirak edib. Murov dağın alınmasında şücaət göstərmişdir.

28.09.2020-cu il tarixində Murovdağ Kəlbəcər istiqamətində gedən döyüşlərdə qəhrəmancasına həlak olmuşdur. 07.12.2020 dəfn edilib.