«KOROĞLU»:»SALAM VERDİM, SALAM ALMAZ…»

KOROĞLU NİGARA:

Salam verdim, salam almaz,
Görüm kəssin salam səni.
Axçasız, pulsuz aşiqəm,
Pulum yoxdu alam səni.

 
Güllü bağlarda gəzərsən,
Cahıllar bağrın əzərsən,
Yuxa kağıza bənzərsən,
Tutmaz qələm, yazam səni.

 
Xəzinəm yox, ağzın açam,
Dövlətim yox, tökəm saçam,
Əlac budu alam, qaçam,
Çənlibelə salam səni.

 
Hansı dağların qarısan?
Hansı bağların barısan?
Nigar, Koroğlu yarısan,
Bilir külli-aləm səni.

(«KOROĞLUNUNU İSTANBUL SƏFƏRİ» QOLUNDAN)

Реклама

ŞƏHİDLƏRİ UNUTMAYAQ: BAKILI QƏHRƏMAN ELDAR TAĞIZADƏ

Eldar Tağızadə 1963-cü il 6 sentyabr Bakı şəhərində anadan olmuşdur.  1980-cı illərdə Nəsimi rayonundakı 164 saylı məktəbi bitirən Eldar Bakı Dövlət Universitetinə daxil olur və 1985-ci il buranı fərqlənmə diplomu ilə bitirir. Daha sonra polis olmaq istəyən Eldar Səbail rayon polis idarəsində çalışmağa başlayır. 1989-cu ildə Sverdlovsk şəhərində kurs keçir və baş leytenant rütbəsini alır. Tağızadə Eldar Daxili İşlər Nazirliyində əməliyyat müvəkklili vəzifəsində çalışırdı.

Cəsur polis işçisi tez-tez cəbhəyə gedir və girovların azad edilməsində iştirak edirdi. 1991-ci ildə ona kapitan rütbəsi də verilmişdi. 3 iyun 1992-ci il Tağızadə yenidən Qarabağa göndərildi. Həmin gün kapitan qəhrəmancasına həlak olur.

Ailəli idi, iki övladı qalıb.

Azərbaycan Respublikası prezidentinin 3 sentyabr 1992-ci il tarixli 162 saylı fərmanı ilə Tağızadə Eldar Abdulla oğlu ölümündən sonra «Azərbaycanın Milli Qəhrəmanı» adına layiq görülmüşdür.

Bakı şəhərinin Şəhidlər xiyabanında dəfn edilib.