20 MAY — BÖYÜK MÜĞƏNNİ VƏ AKTRİSA HƏQİQƏT RZAYEVANIN DOĞUM GÜNÜ

Стандартный

Агигат_Рзаева

Həqiqət Əli qızı Rzayeva (20 may 1907, Lənkəran — 2 avqust 1969, Bakı) — müğənni (soprano), pedaqoq. Azərbaycanın xalq artisti (1946). Azərbaycan səhnəsində çıxış edən ilk qadın müğənnilərindəndir.

Lənkəranın kiçik kəndlərindən birində anadan olmuşdur. Atası Əli kişi o hələ səkkiz aylıqkən dünyasını dəyişir. Həqiqətin anası ikinci dəfə dindar bir kişiyə ərə gedir. 1917-ci ildən Həqiqət Lənkəranda məktəbə getməyə başlayır. Azərbaycan sovetləşəndən sonra  onun ailəsi Bakıya köçür.

Gənc Həqiqətdə operaya və səhnəyə həvəs Bakıda həvəskar teatr dərnəyinə getməsindən sonra yaranır. Dahi bəstəkar Müslüm Maqomayev səsini yoxlayandan sonra onu Opera Teatrında işə götürür.

1928-1932-ci illərdə Azərbaycan Dövlət Konservatoriyasının muğam şöbəsində oxuyur, Cabbar Qaryağdıoğlu, Seyid Şuşinski və Qurban Pirimovdan dərs alır. 1927-1952-ci illərdə Opera və Balet Teatrının solisti, muğam və xalq mahnılarımızın ifaçısı kimi tanınır. Ərəbzəngi («Şah İsmayıl» — Müslüm Maqomayev), Leyli, Əsli, Telli («Leyli və Məcnun», «Əsli və Kərəm», «Arşın Mal Alan» — Üzeyir Hacıbəyov), Şahsənəm («Aşıq Qərib» — Zülfüqar Hacıbəyov) onun yaratdığı əsas səhnə obrazlarıdır.

Həqiqət Rzayevanın kino fəaliyyətinə gəldikdə isə o, çox az filmdə çəkilmişdir. Lakin bu filmlərə baxdıqda onun nəinki bir opera müğənnisi, həmçinin, çox istedadlı bir kino aktrisası olduğunu da görürük. Xüsusilə «Ögey Ana» filmində Qəmər xala obrazını o qədər təbii oynamışdır ki, bu obrazı ondan başqa heç kəs belə oynaya bilməzdi.

Bəstəkar Azər Rzayevin və Həsən Rzayevin anasıdır.

Обсуждение закрыто.